«Спорт және өнер» пән әдіс бірлестігінің аясында мазмұнды іс-шаралар өтті
Мектебімізде «Спорт және өнер» пән әдіс бірлестігінің жоспарлы жұмыстары аясында оқушылардың шығармашылық қабілеті мен салауатты өмір салтын насихаттауға бағытталған көптеген мазмұнды іс-шаралар ұйымдастырылып, жоғары деңгейде өтті.
Аталған бірлестік аясында ашық сабақтар өткізіліп, мұғалімдер өз тәжірибелерімен бөлісіп, заманауи әдіс-тәсілдер арқылы оқушылардың пәнге деген қызығушылығын арттырды. Ашық сабақтар барысында оқушылардың белсенділігі, шығармашылық ойлауы мен спорттық қабілеттері айқын көрініс тапты.
Сонымен қатар, ұлттық рухты дәріптейтін «Толағай» отбасылық сайысы ұйымдастырылып, ата-аналар мен оқушылардың бірлігі мен ынтымағы нығая түсті. Сайыс өте тартысты өтіп, қатысушылар өз ептіліктері мен ұйымшылдығын көрсетті.
Оқушылардың эстетикалық талғамын дамыту мақсатында сурет байқаулары өткізілді. Байқауға ұсынылған жұмыстардың барлығы жоғары деңгейде орындалып, балалардың өнерге деген сүйіспеншілігін айқын аңғартты.
Сонымен бірге, мектеп қабырғасында жәрмеңкелер ұйымдастырылып, оқушылардың еңбекке баулу, кәсіпке қызығушылығын арттыру бағытында тәрбиелік мәні зор жұмыстар жүргізілді.
Аталған іс-шаралар оқушылардың жан-жақты дамуына, шығармашылық және спорттық әлеуетін ашуға зор мүмкіндік берді. Ұйымдастырушылар мен белсенді қатысушыларға алғыс білдіре отырып, алдағы уақытта да осындай тағылымды жұмыстар жалғасын табады деп сенеміз.
Өнер мен спорт – ұлт болашағының кепілі!
