Адал азамат біртұтас тәрбие бағдарламасы аясында "Отырар" жалпы білім беретін мектебімізде «Қыз тәрбиесі – ұлт тағдыры» тақырыбы аясында қыздар үшін тәрбиелік мәні зор кеңейтілген жиналыс және тренинг сабағы өткізілді. Бұл шараның басты мақсаты – жас қыздардың бойына ұлттық құндылықтарды, әдеп пен инабаттылықты, өз-өзін бағалау мен құрметтеу қасиеттерін қалыптастыру, сондай-ақ олардың тұлғалық дамуына қолдау көрсету болды.
Іс-шараны Қыздар ұйымының жетекшісі Г.Төлімбетова және тәлімгер Ф.Төлеген ұйымдастырып, қатысушыларға мазмұнды бағдарлама ұсынды. Тренинг барысында қыздар топтық тапсырмалар орындап, өз ойларын ашық жеткізіп, заманауи қыздың келбеті, мінез-құлық мәдениеті, қоғамдағы орны туралы пікір алмасты.
Шарада қыз баланың болашақ ана, болашақ жар, ең алдымен — өз отбасының көркі, ұлттың айнасы екендігі ерекше атап өтілді. Қазақ халқы қыз тәрбиесіне ежелден үлкен мән бергенін айта отырып, ұйымдастырушылар қыздарға жауапкершілік, сыпайылық, өзіндік ұстаным және өзіне деген құрмет туралы тағылымды кеңестер берді.
Тренинг барысында психологиялық сергіту жаттығулары, жағдаяттық талдаулар, өзін-өзі дамытуға бағытталған тапсырмалар өткізілді. Қыздар белсене қатысып, өз бойларындағы жақсы қасиеттерді тануға, бір-біріне қолдау көрсетуге үйренді.
Іс-шара соңында жетекшілер қыздарға жылы лебіздерін білдіріп, олардың әрқайсысына шынайы тілектерін арнады. Осындай тәрбиелік бағыттағы кездесулер жасөспірім қыздардың тұлғалық қалыптасуына, инабатты, тәрбиелі, жан-жақты болуына үлкен ықпал етеді.
Қыз тәрбиесі – ұлттың рухани биіктігінің өлшемі.
Бүгінгі қыздар – ертеңгі елдің келешегі! 
