Білім сапасын арттыру мақсатындағы коучинг сабағы
Білім беру сапасын арттыру және мұғалімдердің кәсіби біліктілігін жетілдіру мақсатында Отырар жалпы білім беретін мектебінде мұғалімдерге арналған коучинг сабағы өткізілді. Коучингті тәжірибелі педагог Сағындықова Зиягүл ұйымдастырып, жүргізді.
Коучингтің басты тақырыбы – «Білім сапасын арттыру мақсатында зерттеу сабақтарын жүргізу». Сабақ барысында мұғалімдер «Сабақты зерттеу» (Lesson Study) тәсілінің мәнін, оның оқыту процесін жетілдірудегі маңызын және оқушылардың оқу жетістіктерін арттырудағы тиімділігін талқылады.
Коучингтің негізгі мақсаты – мұғалімдердің кәсіби шеберлігін дамыту, оқу үдерісін жетілдірудің заманауи әдістерін меңгерту және тәжірибе алмасуға мүмкіндік жасау болды. Зиягүл Сағындықова әріптестеріне «Сабақты зерттеу» тәсілінің кезеңдері мен ерекшеліктерін жан-жақты түсіндіріп, нақты мысалдар келтірді.
Коучинг барысында мұғалімдер топтық жұмыстар мен практикалық тапсырмалар орындап, өзара пікір алмасты.
Әр қатысушы өз тәжірибесінен мысалдар келтіріп, зерттеу сабақтарын тиімді жоспарлаудың жолдарын талқылады.
«Білемін – Білгім келеді – Білдім» кестесі арқылы мұғалімдердің бастапқы және қорытынды деңгейлері сарапталды.
Қатысушылар коучингтен көптеген пайдалы ақпарат пен тәжірибе жинап, алдағы уақытта «Сабақты зерттеу» тәсілін өз сабақтарында қолдануға ниет білдірді.
Осындай кәсіби бағыттағы шаралар ұстаздардың әдістемелік шеберлігін арттырып, білім сапасын жетілдіруге жол ашады.
#ОтырарМектебі #СабақтыЗерттеу #Коучинг #БілімСапасы #ПедагогтікТәжірибе
