«Рақмет саған, Әліппе!» – білімге бастар алғашқы қадам
"Адал азамат" біртұтас тәрбие бағдарламасы аясында "Отырар" жалпы білім беретін мектебінде
Білім жолындағы ең алғашқы әрі ең қымбат кітап – Әліппемен қоштасу сәті 1-сынып оқушылары үшін ерекше әсерге толы болды. Осыған орай, 1-сынып оқушыларының қатысуымен «Рақмет саған, Әліппе!» атты ашық сабақ ұйымдастырылып, тағылымы мол, мазмұны терең іс-шара өтті.
Ашық сабақтың негізгі мақсаты – оқушылардың әліппе кезеңінде алған білімдерін жүйелеу, әріптер мен дыбыстарды толық меңгергендерін көрсету, сондай-ақ білімге деген қызығушылықтарын арттыру болды. Сабақ барысында бүлдіршіндер әріптер әлеміне жасаған қызықты саяхаттарын ән, тақпақ, көрініс, сұрақ-жауап арқылы әсерлі түрде көрсете білді.
Оқушылардың жүзіндегі қуаныш пен сенімділік, сахнада еркін сөйлеуі – ұстаз еңбегінің жемісі екені анық. Кішкентай жүректер үлкен жауапкершілікпен өнер көрсетіп, көрермендердің ыстық ықыласына бөленді. Әр баланың бойынан білімге деген құштарлық пен алғашқы жетістіктерге деген мақтаныш сезімі байқалды.
Іс-шараға қатысқан қонақтар оқушылардың белсенділігіне, шығармашылық қабілеттеріне жоғары баға беріп, жылы лебіздері мен ақ тілектерін арнады. Мұндай тәрбиелік мәні зор іс-шаралар баланың бойында өзіне деген сенімділікті арттырып, мектепке деген сүйіспеншілігін қалыптастыратыны сөзсіз.
Бұл ашық сабақты жоғары деңгейде ұйымдастырып, шәкірттерін білімге баулып жүрген сынып жетекшісі Қарлығаш Сейітбековаға үлкен алғыс білдіреміз. Ұстаздың тынымсыз еңбегі мен шынайы жанашырлығының арқасында оқушылар алғашқы білім белесін сәтті еңсеріп отыр.
Білімге бастар жол әрдайым нұрлы болсын! Кішкентай оқушыларымыздың алдағы оқу жолында биік белестерді бағындырып, ел болашағы болатын білімді, тәрбиелі азамат болып өсуіне тілектеспіз!
