«Отырар ауданына 90 жыл» мерекелік іс-шарасы 
Отырар ауданының 90 жылдық мерейтойына орай Отырар жалпы білім беретін мектепте тәрбие ісі жөніндегі орынбасары Ж. Абишов пен сынып жетекшілерінің ұйымдастыруымен «Отырар ауданына 90 жыл» атты мерекелік іс-шара өткізілді.
Іс-шара оқушылардың туған жеріне, ел тарихына деген сүйіспеншілігін арттыру, Отырар ауданының тарихымен таныстыру арқылы отансүйгіштікке және рухани құндылықтарды қастерлеуге тәрбиелеу мақсатында ұйымдастырылды. 
Іс-шара барысында оқушы қыздар халық биін мың бұралып билеп, көрермен көңілінен шықты. 
М. Шахановтың «Төрт ана», «Арман», «Отырардың күйреуі» атты өлеңдері мәнерлеп оқылып, Ш. Қалдаяқовтың жүрекке жылы тиер әсем әндері шырқалды. 
Мерекелік жиынның соңында мектеп директоры К. Асылбеков Отырардың бай тарихына тоқталып, бұл қасиетті өңірден 27 ғалымның шыққанын ерекше атап өтті. Сондай-ақ, жас ұрпаққа жылы лебізін білдіріп, елге деген сүйіспеншілікті арттырудың маңызын айтты. 
