Қазақ поэзиясының ақиық ақыны Мұқағали Мақатаевтың 95 жылдығына арналған «Мұқағали жыры – тәрбие көзі» атты 10-сынып оқушыларының тәрбие сағаты тағылымы мол, мазмұнды түрде ұйымдастырылып, жоғары деңгейде өтті.
Аталған рухани кештің негізгі мақсаты – оқушыларға ақын шығармашылығын кеңінен таныту, оның поэзиясы арқылы адамгершілікке, елжандылыққа, туған жерге деген сүйіспеншілікке тәрбиелеу болды. Іс-шараны 10-сынып жетекшісі Б. Шөпшекбаева үлкен жауапкершілікпен ұйымдастырып, оқушыларды жан-жақты дайындап, шығармашылық қабілеттерін шыңдай білді.
Кеш барысында оқушылар ақынның жүрек тебірентер өлеңдерін мәнерлеп оқып, көркем сөз арқылы көрерменнің көңілін толқытты. Сонымен қатар, Мұқағали жырларына жазылған әсем әндер шырқалып, көрермендерге ерекше әсер сыйлады. Оқушылар дайындаған сахналық көріністер ақын өмірінен сыр шертіп, оның тағдырлы жолы мен шығармашылық болмысын тереңірек сезінуге мүмкіндік берді.
Шара аясында сурет салу бөлімі де ұйымдастырылып, оқушылар ақын өлеңдерінен алған әсерлерін қағаз бетіне түсіріп, шығармашылық ой-өрістерін көрсетті. Бұл бөлім оқушылардың тек әдеби емес, бейнелеу өнеріне деген қызығушылығын да арттырды.
Мектеп директоры К.Асилбеков оқушылардың өнері мен дайындығына жоғары баға беріп, рухани құндылықтарды дәріптеудің маңыздылығына тоқталды. Сонымен қатар, ата-аналар да белсенді қатысып, жүрекжарды жылы лебіздерін білдіріп, балалардың өнеріне ризашылықтарын жеткізді. Олар мұндай тәрбиелік мәні зор кештердің өскелең ұрпақтың тұлға болып қалыптасуына үлкен ықпал ететінін атап өтті.
Кеш соңында ақын мұрасының мәңгілік екені, оның жырлары жас ұрпақтың рухани азығына айнала беретіні ерекше айтылды. Осындай мазмұнды шара арқылы оқушылар ұлттық әдебиетке деген сүйіспеншіліктерін арттырып, өз бойларына ізгілік пен адамгершілік қасиеттерін сіңіре түсті.
Ұйымдастырушы сынып жетекшісі Б. Шөпшекбаеваға, белсенділік танытқан 10-сынып оқушыларына, қолдау көрсеткен ата-аналарға зор алғысымызды білдіреміз! Осындай тағылымы мол кештер алдағы уақытта да жалғасын таба береді деген сенімдеміз.
