"Қарттарын қадірлеген ел ардақты" 
Отырар жалпы білім беретін мектебінде 5-сынып жетекшісі Айтжан Элмираның ұйымдастыруымен Қарттар күніне арналған тағылымы мол, мазмұнды тәрбие сағаты өткізілді. Іс-шараға оқушылардың ата-аналары мен әжелері арнайы шақырылып, тәрбиелік мәні зор басқосу өтті.
Тәрбие сағаты барысында мектеп директоры К. Асилбеков сөз сөйлеп, үлкендерді құрметтеу – әрбір перзенттің парызы екенін атап өтті. Ол өз сөзінде: "Қариясы бар ел – қазынасы бар ел. Бүгінгі ұрпақтың бойына ұлттық құндылықтар мен ізгі қасиеттерді дарыту – осындай тағылымды кездесулерден бастау алады" деп ерекше ой қозғады.
Әжелеріміз де жүрекжарды тілектерін айтып, немерелеріне, барша жас ұрпаққа баталарын берді. Олар өздерінің өмірлік тәжірибелерімен бөлісіп, сабырлы, қайырымды, ата-ананы құрметтей білетін азамат болып өсуге шақырды.
Балалар қарттарға арнап өлеңдер оқып, ән-жырдан шашу шашып, үлкендерге деген алғысын білдірді. Әрбір оқушының жүзіндегі қуаныш пен жүректеріндегі мейірім бұл мерекенің шынайы рухын сездірді.
Осындай іс-шаралар жас ұрпаққа қарттарды сыйлауды, олардың әрбір сөзін қадір тұтуды үйретеді. Қарттарға деген құрмет – болашақта өзімізге қайтарылатын ізгілік. 
Қазақ халқы қашанда қариясын ардақтап, "Қарты бар үйдің қазынасы бар" деп бағалаған. Бүгінгі ұрпақ та осы аманатқа адал болып, үлкенге құрмет, кішіге ізет көрсетуді басты міндет санайды.
Құрметті ата-әжелер! Сіздерге мықты денсаулық, амандық, ұзақ ғұмыр тілейміз. Ұрпағыңыздың қызығын көріп, қашанда ортамыздың берекесі болып жүре беріңіздер!
#ҚарттарКүні #ОтырарМектебі #ҚариясыБарЕлҚазыналыЕл #ІзгіліккеТәрбие
